Ақмола облысының сыбайлас жемқорлыққа қарсы волонтерлері Сандықтау ауданы Белгородское ауылында су құбыры желілері мен ұңғымаларды қайта жаңартуға мониторинг өткізіп, бірқатар бұзушылықтарды анықтады.
Тапсырыс беруші аудандық құрылыс бөлімі болып табылатын бұл жобаға шамамен 194 млн бюджеттік теңге бөлінген, алайда жергілікті тұрғындар жаңа инфрақұрылымды үшінші жыл күтуде. Ауыл тұрғындары сумен жабдықтау жүйесі мерзімінің ұзақтығы мен сапасына алаңдаушылық білдіруде. Белгілі болғандай, азаматтардың наразылығы толығымен негізделген.
Мысалы, волонтерлер қазба жұмыстарын жүргізетін экскаватор қалақшасының көлемі техникалық сипаттама бойынша талап етілгеннен көп екенін анықтады. Бұл топырақтың зақымдалған бетінің ұлғаюына және оның терең шөгуіне әкелді.
Осы уақытқа дейін бұрынғы сумен жабдықтау желісін бөлшектеу жүргізілмеген, бұл жаңа желілерді орнатуға теріс әсер етуі және жоба талаптарының бұзылуына әкелуі мүмкін. Айта кетейік, бұл мақсаттарға 19 млн теңгеден астам қаржы бөлінген болатын.
Су құдықтарының люктерін орнату технологиясында да бұзушылықтар анықталды. Люктер жер бетінің деңгейінен төмен орналасқандықтан, жаңбыр суы құдықтарға ағып, бекіту арматурасына кіруге шектеу келтіреді. Волонтерлер мониторинг барысында дәл осы жағдайға куә болды. Олардың айтуынша, қыста ағынды сулар мұзға айналғанда жағдай әлдеқайда қиындамақ.
Анықталған ескертулер бойынша Мемлекеттік сәулет-құрылыс бақылау басқармасы тиісті тексеру жүргізуде.
