Жақсы ауданында алғашқы қажетті азық-түлік өнімдеріне негізсіз бағаның қосылуына жол бермеу мақсатында ауданның барлық ауылдық округтары мен ауылдарына желтоқсанның 2 мен 4-і аралығында мониторингтік топтың рейд шаралары ұйымдастырылды, деп хабарлайды «Aqmola News».
Аталған мониторинг әлеуметтік маңызды азық-түліктің бағасын қымбаттатпау мақсатында апта сайын ұйымдастырылмақ.
«2020 жылы ауданда әлеуметтік маңызды азық-түліктердің бағасын ұстап тұру үшін аудан кәсіпкерлерімен 94 меморандум жасалды. Бүгінгі таңда 19 әлеуметтік маңызды тауарларға тұрақты бақылау жүргізілуде», – дейді Жақсы ауданы әкімдігінен.
Сондай-ақ ауылдық округ әкімдері мен кәсіпкерлеріне ішкі сауда ережелеріне сәйкес ішкі бөлшек сауда субъектілері сатып алу бағасының 15 пайызынан аспайтын үстеме қосуға тиіс екендігі жеткізілді.
