Нұр-Сұлтанда карантиндік зиянкестердің таралып кетпеуі үшін ҚР Ауылшаруашылық министрлігі мемлекеттік инспекторлары 1 210 келі қауіпті мандаринді тәркілеп, зиянды жемістерді экополигон аумағында өртеді. Бұл дерек бойынша әкімшілік іс қозғалып, сот шешімімен өнім иесіне 53 025 теңге көлемінде айыппұл салынды, – деп хабарлайды Aqmola News ақпарат агенттігі Ауыл шаруашылығы министрлігінің баспасөз қызметіне сілтеме жасап.
Елордалық өсімдіктер карантині жөніндегі мемлекеттік инспекторлар фитосанитарлық бақылау барысында Грузия елінен «Комсток сымыры» зиянкесін жұқтырған мандариндердің ірі партиясын анықтады.
«Комсток сымыры» зиянкесі негізінен алмұрт, алма, анар, шабдалы, өрік, банан, інжір, жүзім, долана, катальпа, цитрустар, картоп, қарбыз, қауын, бұрыш және басқа да көкөністерді зақымдайды. «Комсток сымыры» таралған кезде өсімдіктердің жаппай қурауына алып келеді.
