Қаһарман құтқарушы Асқар Забикулиннің анасын Халықаралық әйелдер күнімен құттықтағалы барған Ақмола облысының әкімі Ермек Маржықпаев жуық арада Көкшетау қаласында адам жанын тілсіз жаудан арашалап жүріп өз өмірін құрбан еткен батырға ескерткіш орнатуды ұсынды. Бұл туралы ҚазАқпарат тілшісі хабарлауда.
«Сіздің ұлыңыздың есімі асқан ерліктің, жанқияр қаһармандықтың, қызметтік борышына деген шексіз адалдықтың нышанына айналды. Біз оның осы жерде ер жетіп, білім алғанымен мақтанамыз. Әрдайым жаныңыздан табылып, көмек қолын созуға әзірміз» – деді өңір басшысы батырдың анасы Бибігүл Забикулинамен кездесу кезінде.
Еске салайық, Асқар Забикулин өткен жылдың 16 қарашасы күні Астана қаласында өрт құшағында қалған адамдарды құтқару кезінде ауыр жарақат алып, ауруханада жан тапсырды. Ержүрек құтқарушы қайтыс болғаннан кейін І дәрежелі «Айбын» орденімен және «Алтын адам» сыйлығымен марапатталды, Астана қаласының «Үркер» тұрғын алабындағы көшелердің біріне Асқар Забикулиннің есімі берілді.
