Ақмола облысы ішкі саясат басқармасының «Жастар-ресурстық орталығы» МКМ, Ж.Мусин атындағы жоғары қазақ педагогикалық колледжінде, жас пікір-сайысшыларға арналған облыстық «Үш би» пікір-сайыс турнирін өткізді.
Іс-шараның мақсаты – Ақмола облысы жастарының әлеуметтік-шығармашылық белсенділігін арттыру, қазақстандық қоғамда орын алып жатқан өзекті проблемалық жағдаяттарды талдау және қоғамдық талқылау, нақты мәселелерді шешу жолдары мен тетіктерін қалыптастыру болып табылады.
Турнирді ұйымдастыру өзін мықты спикерлер және объективті төрешілер ретінде көрсете білген бірқатар тәжірибелі пікірсайысшылардан тұратын бас төрешілер алқасына жүктелді.
«Пікірсайыс турниріне Ақмола облысының орта арнаулы оқу орындарының студенттері қатысты. Екі адамнан тұратын командаларға қатысуға рұқсат етіліп, жалпы 12 топ бақ сынасты. Айта кету керек, турнир Британдық Парламенттік форматта өтті. Ойынның жалпы жүлде қоры 330 мың теңгені құрайтын тауарлық сертификаттардан тұрды. Турнир қорытындысы бойынша жеңімпаздардан бөлек «Турнирдің үздік спикері» сияқты номинация бойынша жеңімпаздар анықталды. Студент жастардың жан-жақты дамуында, олардың азаматтық белсенділігі мен интеллектуалды ізденісін, қоғамда дұрыс саяси бағдарларын қалыптастыруда пікір-сайыс додаларының орны ерекше. Қазіргі таңда білім беру мекемелерінің тарапынан да пікір-сайыс ойындарын жаңғырту, дамыту ісіне көп көңіл бөлінуде. Бүгінгі турнир өте қызу түрде өтіп, қатысушылардың шабыттары оянып, қара терге шомылғандай жеңіске жетем деген ынталары байқалып, ойларын еркін жеткізуге деген мүмкіншіліктері пайда болды. Іс-шараны, Көкшетау қаласының Ж. Мусин атындағы жоғары қазақ педагогикалық колледжінде бірлесіп, өткіздік. Аталмыш мекеме басшылығына айтар алғысымыз шексіз. Алдағы уақытта әлі де талай шараларды бірлесе өткізетінімізге кәміл сенемін» – деп облыстық ЖРО бөлім басшысы Асия Закенай өз сөзінде тоқталып кетті.
Облыстық пікір-сайыс турнирінің қорытындысы бойынша 1 – орынды 150 000 теңгелік тауарлық сертификат және кубокпен «Болашақ сарайы» мекемесінен «Шабыт шарығы» құрамасы қанжығасына салды. 2 – орынды 100 000 теңгелік тауарлық сертификатпен Ш. Уәлиханов атындағы Көкшетау универститетінен «Хаома варга» құрамасы алса, 3 – орын және 50 000 теңгелік тауарлық сертификатпен Ж. Мусин атындағы жоғары қазақ педагогикалық колледжінен «The wordsmiths» құрамасы иеленді. Сонымен қатар, «Үздік спикер» номинациясының иегері атанған және 30 000 теңгелік тауарлық сертификатпен марапатталған Кеңес Назерке, өзін ерекше көрсете білді.
Ойын соңында Ақмола облысы пікір-сайыс турнирінің төрешілері орталық атынан арнайы алғыс хаттар және естелік сыйлықтармен марапатталды.
