Кеше Ақмола облысының әкімі Марат Ахметжанов жұмыс кестесінен тыс Қосшы қаласындағы Жедел жәрдем орталығына барды, сонымен бірге туристік нысандарын аралап, қар тазалау жұмыстарын тексерді.
Қаладағы Жедел жәрдем орталығына облыс әкімі ескертусіз келіп, материалдық-техникалық жарақтандыруды тексеріп және мекеме қызметкерлерімен сөйлесті. Орталық қалалық емхананың ғимаратында орналасқан.
Әкімнің мұнда ескертусіз баруына шаһар тұрғындарының 103 бірыңғай желісіне қатысты көптеген арыз-шағымдары себеп болған. Бұл мәселені шешу үшін қоңырауларды қабылдауды жақсартудың жаңа тәсілдерін қарастыру қажеттігі айтылды.
Аймақ басшысы жедел жәрдемнің Бірыңғай ақпараттық жүйесін қамтамасыз етуді, материалдық-техникалық жарақтандыруды жақсартуды, атап айтқанда қосымша жабдықталған 2 жедел жәрдем көлігін бөлуді тапсырды.
–Қалада халық саны белсенді өсуде. Жедел жәрдем қызметкерлері күн сайын арнайы тапсырма орындайды. Біздің міндетіміз – олардың жұмыс істеуіне қолайлы жағдай жасау, – деді Марат Мұратұлы.
Салынып жатқан өрт сөндіру бекетін аралаған облыс әкімі стратегиялық нысанның маңыздылығын және оның құрылысын ерекше бақылау қажеттігін атап өтті.
Қала бойынша жұмыс сапары аясында қар тазалау жұмыстары тексерілді. Қосшы қаласының әкіміне су тасқынына қарсы іс-шараларды тиісті деңгейде жүргізіп, қарды уақытылы шығаруды ұйымдастыру тапсырылды.