Еркін күрестен Токио Олимпиадасында 74 келі салмақта белдесіп, қола медальға таласқан қазақстандық балуан Данияр Қайсанов қарсыласына есе жіберді.
Қайсанов қола жүлде үшін белдесуде өзбекстандық Бекзод Абдурохмановқа қарсы шыққан еді. Өкінішке қарай, кездесу басталған бетте Абдурохманов алға ұмтылып, белдесу мерзімінен бұрын аяқталды. Өзбек балуаны 13:2 есебімен жеңіске жетті.
Данияр Қайсанов Олимпиада ойындарын бесінші орынмен аяқтап отыр.
Еске салайық, 5 тамызда Данияр Қайсанов жартылай финалда екі дүркін әлем чемпионы – ресейлік Заурбек Судаковпен белдесіп, 11:0 есебімен жеңілді. Ол 1/8 финалда жапон балуаны Отогуро Кейсукені, ширек финалда мысырлық Амр Реда Хуссенді жеңген еді.
