Қазақстан Республикасы Парламент депутаттығына сайлау додасына Ақмола облысынан үш кандидат қатысқан. Зеренді аудандық мәслихат депутаттарымен ұсынылған Нұрлан Бекенов Ақмола облысынан сенат депутаты болып сайланды, – деп хабарлайды «Aqmola News».
Майра ҚУАНЫШҚЫЗЫ
Бұл туралы Зеренді ауданыдық мәслихатының хатшысы Қайрат Ауғалиев мәлім етті.
Дауыс беру қорытындылары бойынша, Парламенттің жоғары палатасына Ақмола облысынан депутат болып Бекенов Нұрлан Жексембайұлы сайланды. Сайлау қорытындысы бойынша Нұрлан Жексембайұлы 213 дауыспен жеңіске жетті. Нұрлан Бекеновтың кандидатурасы Зеренді аудандық мәслихатының депутаттарымен ағымдағы жылдың 15 маусымындағы сессиясында ұсынылған болатын. Нұрлан Жексембайұлын жауапты лауазымға сайлануымен шын жүректен құттықтап, сенаторлық қызметте толағай табыс тілейміз, – деді Қайрат Ауғалиев.
Нұрлан Бекенов – Ақмола облысы бойынша тексеріс комиссиясының төрағасы. Ол Целиноград ауыл шаруашылығы институтын, Көкшетау экономика және менеджмент институтын бітірген. «Ерен еңбегі үшін» медалінің иегері.
Естеріңізге сала кетейік, бүгін елімізде Парламент Сенаты депутаттарын сайлау өткізілді.
