Степногорск қаласында да жергілікті өнеркәсіп орындары коронавирус инфекциясымен күреске қаржылай қолдау білдіруде. Солардың бірі «Қазақалтын» ТМК» акционерлік қоғамы Степногорск қаласындағы көп салалы ауруханаға жасанды тыныс алу аппаратын сатып алды, – деп хабарлайды «Aqmola News».
Майра ҚУАНЫШҚЫЗЫ
Бұл туралы Степногорск қаласы әкімдігінен хабарлады.
Кәсіпорын құны 23 миллион теңге болатын жабдықты коронавирус және пневмониядан зардап шеккен адамдарға жеткізуді жөн санапты.
Осы қиын кезеңде біз шетте қала алмадық және концерніміздің ұжымы атынан жерлестерімізге көмектесуді ұйғардық. Сіздер емес, біз сіздерге алғысымызды айтуымыз қажет. Бұл көрсетіліп отырған көмектің бір ғана көрінісі, – деп атап өтті концерн бас директоры Баламир Маханов.
Компания бұдан бөлек 19 миллион теңге сомасына 20 оттегі концентраторларын да ауруханаға тарту етпек.
Степногорск қалалық көпсалалы ауруханасының бас дәрігері Ольга Ищукова да кәсіпорын басшылығына ризашылығын білдіріп, медициналық жабдықтардың науқастардың өмірі үшін аса маңызды екенін атап өтті.
«Қазақалтын» кәсіпорны тыныс алу аппараты мен 10 оттегі концентраторларын Шортанды аудандық ауруханасына да жеткізуді көздеп отыр. Өндіріс орны аталған медициналық жабдықтарды сатып алуға 35 миллион теңгеге жуық қаржы бөлген.
