Ақмола облысында шілденің 14-нен бастап COVID-19 баспасөз орталығы жұмыс істей бастады, – деп хабарлайды «Aqmola News».
Баспасөз орталығы өңірдегі коронавирус инфекциясын емдеу және таралуына жол бермеу бойынша ақпараттық-түсіндіру жұмыстарын жүзеге асырмақ. Негізгі міндеті халықпен және бұқаралық ақпарат құралдарымен өзара тиімді байланыста әрекет ету болып отыр.
Баспасөз орталығында 109 нөмірлі Call-орталық ашылған. Онда кез-келген тұрғын коронавирус инфекциясы бойынша онлайн түрде амбулаториялық емделу, дәрі-дәрмекпен қамтамасыз ету, ауруханаға жатқызу, жедел жәрдем шақыру, психологиялық кмек және басқа да сауалдарымен қоңырау шала алады. Орталық күн сайын таңғы 9.00-ден кешкі 21.00-ге дейін тұрақты жұмыс істемек.
Сонымен қатар, ауру белгілері жоқ тасымалдаушылардың және COVID-19 вирусының жеңіл түрімен ауырған науқастардың көбеюіне байланысты емханалар мен жедел жәрдем қызметінің жүктемесі ауырлаған. Осыны ескере келе әрбір медициналық ұйымдарда пациенттерді қолдауға арналған коронавирус инфекциясы бойынша онлайн-кеңес беру қолға алынды.
Кеңес беретін телефон нөмірлері Ақмола облысы денсаулық сақтау басқармасының ресми парақтарында орналастырылған.
Баспасөз орталығына 50-70-61 телефоны арқылы хабарласуға болады. Сондай-ақ, Covid Aqmola және Instagram – covid19_aqmola әлеуметтік желідегі парақшалары жұмыс істеуде.
