Облыста санитарлық авиацияның жедел көмегі арқасында ауыр хәлдегі бала уақытылы медициналық мекемеге жеткізілді. Бұл жолы арнайы рейсті Қазавиақұтқару тікұшағы орындады.
Экипаж Көкшетау – Степногорск – Көкшетау бағыты бойынша санитарлық ұшуды жүзеге асырды. Ұшудың негізгі мақсаты – 2024 жылы туған баланы ауыз қуысының шырышты қабығының химиялық күйігі диагнозымен шұғыл түрде ауруханаға жеткізу болды.
Дәрігерлердің шешіміне сәйкес, науқасқа жедел әрі мамандандырылған көмек көрсету үшін әуе арқылы тасымалдау ең тиімді жол деп танылды. Ұшу барысында медициналық бригада баланың жағдайын үнемі бақылап, қажетті шараларды дер кезінде қабылдады.
Рейсті әуе кемесінің командирі Бейбіт Смағұлов пен екінші ұшқыш Шыңғыс Мәлікриянов басқарды. Экипаждың кәсібилігі мен үйлесімді жұмысының нәтижесінде бала қысқа уақыт ішінде емдеу мекемесіне аман-есен жеткізілді.
ТЖМ санитарлық авиациясы шалғай елді мекендерде тұратын тұрғындарға медициналық көмекті жедел көрсету ісінде маңызды рөл атқарып келеді. Арнайы жабдықталған тікұшақтар кез келген уақытта ұшуға дайын.
Мұндай рейстер – адам өмірін сақтауға бағытталған жүйелі жұмыстың нақты көрінісі. Төтенше жағдайлар министрлігінің авиациясы алдағы уақытта да азаматтардың қауіпсіздігі мен денсаулығын қорғау жолында өз қызметін жалғастыра бермек.
Фото: Ақмола облысы әкімдігінің
