Ақмола облысында оқушыларға ғылымды тек сыныпта ғана емес, үй жағдайында да меңгеруге мүмкіндік беретін бірегей жоба басталды. Енді балалар арнайы жинақтардың көмегімен химия, физика және биология пәндері бойынша тәжірибелерді өз бетімен жасай алады. Жобаның қалай пайда болғаны және оның балаларға берер мүмкіндіктері туралы Шоқан Уәлиханов атындағы университеттің оқытушысы Азиза Ескендірова мәлімдеді.
Спикердің айтуынша, бірнеше жыл бұрын университет ғалымдары грант ұтып алып, «Балалар университеті» жобасын іске қосқан. Бұл – балаларды химия, биология, физика және басқа да жаратылыстану ғылымдарымен тәжірибелер мен практикалық сабақтар арқылы таныстыратын білім беру алаңы.
«Сабақтардан кейін балалар тоқтағысы келмейтінін байқадық. Олар тәжірибе жасап, зерттеп, ізденуді жалғастырғысы келді. Сол кезде университет зертханасын балалардың өз үйіне көшіру идеясы пайда болды», – дейді Азиза Ескендірова.
Осылайша барлық қажетті материалдар, реактивтер мен нұсқаулықтар жинақталған зертханалық жиынтықтар форматы әзірленді. Бұл баланың қосымша құрал-жабдық іздемей, ата-ананың көмегінсіз-ақ үй жағдайында тәжірибе жүргізуіне мүмкіндік береді.
Жинақтардың басты ерекшелігі – оқыту жүйесінің кезең-кезеңімен құрылуы. Тапсырмаларды орындау барысында балаларда себеп-салдарлық ойлау, талдау және бақылау дағдылары қалыптасады.
«Бала тәжірибені жай ғана нұсқаулық бойынша қайталамайды. Ол қорытынды жасап, талдайды, нәтижелерін тіркейді. Бұл – нағыз зерттеу жұмысы», – деп атап өтті спикер.
Жинақтар 3–4 сынып оқушыларына арналған. Оқытушының айтуынша, дәл осы жаста балаларда ғылымға деген тұрақты қызығушылық қалыптасып, табиғи құбылыстарды түсіну қабілеті дами бастайды. Қазіргі таңда химия, физика және биология пәндері бойынша жинақтар әзірленген. Мәселен, химия бөлігінде ерітінділердің қышқылдығын зерттеу, слайм жасау, тіпті парфюмерия негіздері бойынша тәжірибелер бар. Барлығы қауіпсіз компоненттерді пайдалану арқылы жүзеге асырылады.
Жоба аясында цифрлық технологиялар да кеңінен қолданылуда. Қатысушылар үшін бейненұсқаулықтар, теориялық материалдар мен тапсырмалар орналастырылған арнайы сайт жасалған. Сонымен қатар тәжірибелерді түсінуге және туындаған сұрақтарға жауап алуға көмектесетін виртуалды ассистент енгізілген.
«Осылайша бала практикалық тұрғыда ғана емес, теориялық жағынан да дамиды. Алдымен тақырыпты меңгеріп, кейін білімін бірден іс жүзінде қолдана алады», – деп түсіндірді Ескендірова.
Алдағы уақытта әзірлеушілер жинақтардың мүмкіндігін кеңейтіп, күрделірек форматқа – ұзақ мерзімді бақылаулар мен тәжірибелерге негізделген жобалық қызметке көшуді жоспарлап отыр.
Сонымен қатар зертханалық жинақтарды мектептерге, STEM-кабинеттерге, жекеменшік білім беру орталықтарына енгізу, сондай-ақ шеберлік сабақтары мен қосымша білім беру аясында пайдалану мүмкіндігі де қарастырылуда
