Ақмола облысы халықаралық World Cleanup Day бастамасын және республикалық «Таза Қазақстан» акциясын қолдады. 20 қыркүйекте өңір тұрғындары кең ауқымды сенбіліктерге шықты. Әр аудан мен қалада тазалық жұмыстары ұйымдастырылып, басты алаңдар Көкшетау мен Қосшыда өтті. Дәл осы жерлерде экологиялық бастама айрықша мәнге ие болып, жүздеген қатысушыны жинады.
Көкшетаудағы сенбілік Бұқпа тауында өтті. Акцияға Экология департаментінің қызметкерлері, коммуналдық мекемелер, студенттер мен мектеп оқушылары атсалысты. Экология департаментінде атап өткендей, бұл – өңірдің жүйелі жұмысының бір бөлігі.
«Жылдың бірінші жартысында Ақмола облысында аталған акцияға 463 мыңнан астам адам жұмылдырылып, 80 мың тоннадан астам қоқыс жиналды. Бүгінгі шара – сол жұмыстың жалғасы. Сенбіліктер 11 қазанға дейін жалғасады, ал 4 қазанда біз ауқымды ағаш отырғызу ісін қолға аламыз», – деді Экология департаментінің мемлекеттік экологиялық бақылау бөлімінің басшысы Арыстанбек Тасқынбаев.
Акцияда жастардың рөлі ерекше болды. Шоқан Уәлиханов атындағы университеттің студенттері тұтас топ болып шығып, экологияның студенттік өмірдің бір бөлігіне айналып келе жатқанын көрсетті. Ал мектеп оқушылары мұндай сенбіліктерге қатысуды өздерінің мүмкіндіктерін кеңейтудің бір жолы деп санайды.
«Көкшетаудан шамамен 300 оқушы UNICEF-тің халықаралық волонтерлік қозғалысына тіркелді. Біз қазірден бастап оқудан өтіп жатырмыз және сертификат аламыз. Бұл бізге қызмет аясын кеңейтуге жол ашады», – деді 10-сынып оқушысы Айша Алтынбек.
Қосшыда экологиялық жұмыс Сарқырама өзенінің жағасында өрбіді. Екі жүзден астам қала тұрғыны мен студент тазалыққа қатысып қана қоймай, қалдықтарды бөлек жинауды да үйренді.
«Жазда қалада „Жасыл ел“ акциясы өтті, оған 90-ға жуық жас қатысты. Жыл сайын қатысушылар саны артып келеді, бұл бізді қуантады. Біз үшін тәртіпті сақтау ғана емес, жастарға қоршаған ортаға жауапкершілікпен қарауды үйрету де маңызды. Мұндай шаралар – нағыз тәрбиелік мектеп, мұнда жастар топпен жұмыс істеуді және еңбегінің нәтижесін көруді үйренеді», – деді қала әкімі Азамат Қапышев.
