Ақмола облысы Сандықтау аудандық сотының мәліметінше, мемлекет басшысының тапсырмасын орындау мақсатында, құқық бұзушылардың отбасылық-тұрмыстық қатынастар саласындағы құқыққа қайшы әрекеттері үшін жауапкершілігі күшейтілді.
ӘҚБтК-нің 73, 73-1, 73-2, 461, 669-баптарында көзделген құқық бұзушылықтар жасағаны үшін қамаққа алу түріндегі әкімшілік жазаның мерзімі ұлғайтылды.
Сандықтау аудандық соты жұбайының денсаулығына жеңіл зиян келтіргені үшін «П.»-ға қатысты әкімшілік құқық бұзушылық туралы іс қарады (ӘҚБтК 73-1-бабының 1-1-бөлігі).
Азамат «П.» мас күйінде, жұбайымен жанжал кезінде оның бетіне және басына жұдырықпен ұрып, денсаулығына жеңіл зиян келтірді.
Сот қаулысымен «П.»-ға, оның мінез-құлқына 3 айға ерекше талаптар белгіленіп, 15 тәулікке қамаққа алу тағайындалды.
Сот, отбасылық-тұрмыстық қатынастар саласындағы құқық бұзушылықтардың алдын алу мақсатында, осындай құқық бұзушылықтар үшін бірнеше рет әкімшілік жауапкершілікке тартылған азаматтарды қатыстырып, жария сот отырысын өткізді.
