Ақмола облысында 31 наурыз сағат 19.00-ден бастап уақытша сипаттағы карантин енгізіліп, өңірге барлық автокөліктер мен азаматтардың кіріп-шығуына тыйым салынады. Осыған байланысты ақмолалық полицейлер карантин режимін бұзғандарға қандай жаза тағайындалатынын мәлімдеді, – деп хабарлайды «Aqmola news» ақпарат агенттігі.
Карантин режимінде заң талаптарын орындамағандар 10 АЕК мөлшерінде айыппұл салынып немесе 15 тәулікке дейін қамауға алынады – деді облыстық полиция департаментінің баспасөз қызметінен.
Төтенше жағдай режимін бұзушыларға заңмен әкімшілік жазалар қарастырылғанымен, тәртіпке бағынбай заңды бұзғандар күн сайын полицияның құрығына ілінуде. Мәселен 29 наурызда Нұр-Сұлтан –Қосшы трассасын бойлай жүрген үш адам ауыл арасындағы жолмен карантин аймағынан кесіп өтпек болғанда қолға түсті. Жалпы төтенше жағдай енгізілгелі бері 28 іс қозғалды. 23 көңіл көтеру орындарының иелері әкімшілік жауапкершілікке тартылды.
Карантиндік шектеу шараларының енгізілуімен облыс шекарасында 8 және Көкшетау қаласында 12 блок-бекеттер орнатылмақ. Ал қылмыстық және қоғамдық-саяси жағдайлар туындаған жағдайда полиция департаменті мен 5510 Ұлттық гвария әскері шұғыл жоспарда әрекет етуге әзірленген.
