«Digital Agroleaders 2025» студенттік байқауы – Қазақстанның аграрлық саласындағы болашақ көшбасшыларын анықтауға бағытталған бірегей платформа. Байқауда еліміздің әр өңірінен келген үздік студенттер өз білімдері мен инновациялық идеяларын ортаға салды.
Осы беделді байқауда Ақмола облысының «Орман шаруашылығы, экология және туризм жоғары колледжі» студенті Иван Сергеевич Ермоленко жеке есепте 1-орын иеленіп, АҚШ-тағы «John DEERE» зауытында тағылымдамадан өту мүмкіндігіне ие болды. Бұл – әлемдегі ауыл шаруашылығы техникасын өндіруші жетекші компаниялардың бірі. Жеңіс иесі – «Ауыл шаруашылығын механикаландыру» мамандығының 2-курс студенті.
Колледж студенттері бұл байқауға белсене қатысты. Атап айтқанда, аталған мамандықтың 1–2 курс студенттері Максим Александрович Брага мен Данил Максимович Шейгец, сондай-ақ «Мехатроника» мамандығының студенттері Сати Сергеевна Алесханова және Андрей Алексеевич Мельник өз жобаларын сәтті қорғап шықты.
Айта кетерлігі, Сати Сергеевна Алесханова байқауда 2-орын алып, Германияда тағылымдамадан өту мүмкіндігіне ие болды. Бұл – оның болашақ кәсіби дамуына берілген үлкен серпін.
Колледждің халықаралық бағыттағы жүйелі жұмысы мұнымен шектелмейді. 2022 жылы дәл осы оқу орнының студенті Глеб Владимирович Шубин Германияда экологиялық фермада алты айлық тағылымдамадан өтіп, кәсіби біліктілігін арттырды.
Колледж басшылығы шетелдік кәсіпорындармен тұрақты байланыс орнатып, студенттерге тәжірибе алмасу мен жаңа технологияларды меңгеру мүмкіндігін беруде. Бұл тәжірибелер олардың еңбек нарығындағы бәсекеге қабілеттілігін арттырып, Қазақстанның агроөнеркәсіптік кешеніне білікті кадрлар даярлауға жол ашады.
«Digital Agroleaders 2025» байқауындағы бұл жеңістер – колледждің халықаралық білім кеңістігіне интеграциялану стратегиясының нақты жемісі.
