Еліміздің он екі аймағынан 2 691 оқушы ағылшын тілінен бақ сынап, «KGL Contest» халықаралық олимпиадасына қатысты. Сайыстың бірінші кезеңінің нәтижесі көрсеткендей, біздің балалардың шет тілін меңгеру деңгейі айтарлықтай жоғары. Тестті 9 бен 17 жас аралығындағы оқушылар тапсырды. Сайысқа қатысу идеясын отандық мектептерге ағылшын тілі пәнінің оқулығын Оқу-ағарту министрлігінің МЖМБС талабына сай әзірлеген Қазақстандағы «Express Publishing» компаниясы ұсынған.
«KGL Contest» – барлық жастағы және түрлі деңгейдегі оқушылардың ағылшын тілін қаншалықты меңгергенін анықтауға арналған жалғыз халықаралық олимпиада (Ұлыбритания). Оның ерекшелігі – түрлі елдің балалары тестті бір күнде тапсырып, сынақ сұрақтарына қатысушының жасы мен шет тілін білу деңгейіне сәйкес құрастырылғанында. Олимпиада екі кезеңнен тұрады: алғашқысы биыл 15 ақпанда өтіп, оқушылар тест талабына сай сұрақтың дұрыс жауабын белгіледі. Pre A1 және А1 деңгейінің қатысушыларына 45 минут берілсе, ағылшын тілін жоғары – В1 және В2 деңгейінде білетіндерге жауап беруге 60 минут бөлінді. Бірінші кезеңнің нәтижесі бойынша олимпиадаға елімізден қатысқан 2 691 баланың 530-ы 90%-дық межелі деңгейді еңсеріп, екінші турға жолдама алды. Наурыз мерекесі қарсаңында – 15 наурызда олар оқуды, аудио тыңдауды және жазуды тексеруден тұратын ұзақтығы 60-90 минуттық екінші тестті тапсырды. «KGL Contest»-тің британдық бас кеңсесі шешуші кезеңнің нәтижесін алдағы сәуір айында жариялайды.
– «KGL Contest» халықаралық олимпиадасының екінші кезеңіне өткен 530 оқушы межеден өтуге жол ашатын 90% ұпай жинады. Анығын айтсақ, соның ішінде 25 баланың деңгейі – Pre A1, 78 баланікі – А1, 144 бала ағылшын тілін А2 деңгейінде меңгерген, ал 151 баланікі – В1 және 132 баланың деңгейі – В2. Аймақтарды салыстырсақ, екінші кезеңнің межесінен өткендердің саны жағынан көш бастағандар Алматы қаласы мен Қызылорда облысы – сәйкесінше, жалпы олимпиадаға қатысқандардың 412 және 42 оқушысын құраған. Себебі аталған өңірлер өте белсенді атсалысып, Алматыдан 2 038 және Қызылорда облысынан 303 адам тіркелді, – дейді дерекпен бөліскен «EDU Stream» халықаралық тіл академиясының Бас директоры Наталья Мұхамеджанова.
Қатысушы әр топқа жауапты супервайзер бекітілген. Олимпиаданы ұйымдастыру рәсімін бір күнге Ұлыбританиядағы бас кеңсе бекіткен, сұрақтарды жариялау, тест тапсыру және нәтижесін жинап, жапсырып «KGL Contest»-ке жіберу секілді қатаң ереже бойынша өткізілді. Содан соң баланың білімі адамның қатысуынсыз ақпаратты жинаумен айналысатын жүйе негізінде анықтады.
– Халықаралық олимпиаданың бірінші кезеңіндегі нәтижесінің ең жағымды тұсы – жас ұрпақтың ағылшын тілін бізге, ересектерге қарағанда академиялық деңгейде таза меңгергені. Тоғыз жыл бұрын елімізде орта білім саласында жаңартылған оқу бағдарламасын енгізгенде ағылшын тілінің оқу-әдістемелік кешенін әзірлеушілерге қойылған басты талап, оқушылардың шет тілін B2 көрсеткішіне – орташадан жоғарыға жеткізу болатын. «KGL Contest»-тің алғашқы кезеңінің бүгінгі нәтижесіне қарап, діттеген мақсатқа қол жеткіздік деп нық сеніммен айта аламыз, – дейді Наталья Мұхамеджанова.
Қазақстан оқушыларының ағылшын тілін қаншалықты меңгергенін тексеретін болсақ, «KGL Contest» халықаралық олимпиадасының осы нәтижелерін негізге алған дұрыс, дейді отандық мектептерге ағылшынмен қатар неміс, француз және орыс тілі пәндерінің оқулығын әзірлеген мамандар – «EDU Stream» сарапшылары. Неге десеңіз, тесттегі дерек айқын: сұрақтар баланың жасы мен шет тілін білу деңгейіне шақталған, кім және қай жақтан тапсырғаны және сұрақтар қалай құрастырылғаны туралы нақты ақпарат және тағы басқа талаптары айқындалған. Айта кету керек, «EDU Stream» – британдық «Express Publishing» баспасының еліміздегі эксклюзивті өкілі. Қазақстан мектептерінің 70% ағылшын тілін Оқу-ағарту министрлігінің жаңартылған білім беру мазмұны бағдарламасына сәйкес «Express Publishing» әзірлеген оқу-әдістемелік кітаптары бойынша оқиды.
Екінші кезең жеңімпаздарын «KGL Contest» халықаралық олимпиадасы 4 категория бойынша – А1 деңгейінің жеңімпазы, А2 деңгейінің жеңімпазы, В1 деңгейінің жеңімпазы және В2 деңгейінің жеңімпазы деп ағылшын тілін меңгерудің әлемдік стандартына сай анықтайды. Үздіктер ішінен оқ бойы озғандарды марапаттау рәсімі Афинада – «KGL Contest»-тің аймақтағы кеңсесінде өтеді. Екінші турда Қазақстан оқушылары жеңіске жетсе, «EDU Stream» халықаралық тіл академиясы ең үздік отандастарымызды Афинаға өз қаражатына алып бармақ.
