Атбасар ауданының әкімі Аманбек Қалжановтың төрағалығымен өңірдегі су тасқынының күрделі жағдайына байланысты жедел штаб отырысы өтті.
Жедел штаб отырысына ауданның мемлекеттік мекемелері мен кәсіпорындарының басшылары қатысты.
Бұған дейін ауданда төтенше жағдай режимі жарияланған болатын. Атбасар қаласының 19 көшесі қарғын судың астында қалып, тұрғындары эвакуацияланып, қауіпсіз орынға көшірілген. Қазіргі уақытта онда тасқын судың салдарынан келтірілген шығынды анықтап, халыққа қайтару бойынша комиссия өз жұмысын бастап кеткен.
–Тасқын судан зардап шеккен, бір реттік жәрдемақы алатын тұрғындардың тізімі бүгін анықталуы тиіс, – деді отырыста аудан басшысы.
Штаб отырысында су басқан аулалар мен аумақтарды тексеру бойынша жауапты тұлғалар бекітіліп, әрі қарайғы жұмыс жүргізу жоспары құрылды.
