Облыс әкімі Марат Ахметжановтың төрағалығымен өткен жиында Ақмола облысында елді мекендердегі өрт қауіпсіздігін қамтамасыз ету және су тасқынына қарсы іс-шараларды жүзеге асыру мәселелері талқыланды.
Ақмола облысы төтенше жағдайлар департаменті бастығының міндетін атқарушы Қанат Доспаев облыстағы атқарылып жатқан жұмыстар мен бүгінгі жағдайға тоқталды.
«Пешті жылыту және электр жабдықтарын монтаждау кезінде өрт қауіпсіздігі ережелерін бұзу салдарынан тұрғын үй секторында ең көп өрттер тіркелді. Өңірде өртке қарсы қорғанысты күшейту мақсатында ведомство жаңа техникалар мен жабдықтар сатып алды, өрт сөндіру депосын салу қарқынды жүргізілуде. Қыста жауын-шашынның көп мөлшері күтіледі, бұл көктемде су тасқыны жағдайларының асқынуын тудыруы мүмкін. Сондықтан су тасқынына қарсы шараларды жүргізу ерекше маңызды. 400 адам мен 73 техника әзірлікте», – деді Қ.Доспаев.
Айта кетейік, су басу қаупі жоғары өңірлерге Целиноград, Аршалы, Атбасар, Сандықтау және Астрахан аудандары жатады.
«Су тасқынына қарсы іс-шараларға дайындық кезінде барлық қателерді ескеру қажет. Су тасқынының келеңсіз құбылыстарының алдын алу, елді мекендерді, кіреберіс жолдарды, тіршілікті қамтамасыз ету объектілерін қардан жедел тазарту және шығару, мұз кептелістерін жою және қосымша техника сатып алу бойынша бірқатар шараларды жүргізу қажет.
Өрт қауіпсіздігін қамтамасыз ету де жергілікті атқарушы органдардың негізгі міндеттерінің бірі болып табылады. Өрт сөндіру гидранттары мен су қоймаларын жөндеуді аяқтау қажет. Бірлескен күш-жігер арқылы біз облыс тұрғындарының қауіпсіздігі мен әл-ауқатын қамтамасыз ете аламыз», – деген М. Ахметжанов барлық басқарма басшыларына, аудан, қала әкімдеріне бұл мәселелерді ерекше бақылауға алуды тапсырды.
Өңір басшысы өрт қауіпсіздігі ережелерін сақтау және су тасқынына қарсы іс-шараларды қамту бойынша ақпараттық жұмыстардың маңыздылығына да тоқталды.
