Ақмола облысының әкімі Марат Ахметжанов Қорғалжын ауданы Сабынды ауылында Егіндікөл және Қорғалжын аудандары әкімдерінің, су ресурстары комитеті, ТКШ облыстық басқармасы, мердігер ұйымдар, Нұра топтық су құбыры және басқа да мүдделі тұлғалардың қатысуымен сумен қамтамасыз ету мәселесі бойынша жедел кеңес өткізді.
Марат Ахметжанов халық үшін сумен жабдықтау мәселесін шешудің маңыздылығын атап өтті.
«Мердігерлік ұйым жұмысты тоқтаусыз жүргізгеніне қарамастан, Нұра топтық су құбырын қайта құрудың екінші кезеңінің бірінші учаскесі өкінішке орай, жоспарланғандай Жаңа жылға дейін аяқталмайды. Осы кезеңнің аяқталуы су шығынын азайтуға мүмкіндік береді», – деп атап өтті Марат Ахметжанов.
Ирригация және су ресурстары министрлігі Су ресурстары комитеті төрағасының орынбасары Мақсат Аяшевтің айтуынша, бұл мәселе ерекше бақылауда.
Мердігер ұйымның өкілі Рустам Манатаев атқарылған жұмыстар туралы айтып берді.
«Бүгінгі таңда Егіндікөл ауылынан 26 мың метр траншея қазылды, Сабынды ауылының бас құрылыстарынан 31630 метр. Барлығы 57696 метр траншея қазылды. 42570 метр құбыр төселді. 22 құдық орнатылды. Барлығы 68,4 км магистральдық су құбыры ауыстырылуға жатады. Ауа-райы жағдайлары жұмыстарды баяулатты. Қазір нысанда 12 экскаватор бар», – деді» Bertys Construction » ЖШС директоры Р.Манатаев.
Кездесу барысында өңір басшысы Ушаково ауылындағы магистральдық су құбырындағы ақауды жоюды, сондай-ақ кезекші бригадаларды, ақауларды жою үшін техниканы ұйымдастыруды және 31 желтоқсанға дейін халыққа су беруді қамтамасыз етуді тапсырды.
«25 қазанда ұзақ уақыт болмағаннан кейін үйлерге су келді. Қазір аудан әкімдігі су тасымалдауды ұйымдастырды», – деді облыс әкімі.
Айта кетейік, ұзындығы 337 км су құбыры Егіндікөл, Қорғалжын және Атбасар аудандарының 24 елді мекенін сумен жабдықтау көзі болып табылады.
