13 млн. теңгеден астам бюджеттік қаражатты аса ірі көлемде жымқырғаны үшін, 03.07.2023 жылы Егіндікөл аудандық сотымен сол аудан ауруханасының Кадр бөлімінің басшысына 7 жыл бас бостандығынан айыру және өмір бойы лауазымды қызметтер атқару құқығынан айыру туралы үкім шығарылды, деп хабарлайды Ақмола облысы прокуратурасының баспасөз қызметі.
Прокурорлық тексеріс нәтижесінде, аурухананың бас дәрігері кадр бөлімінің басышысымен қылмыстық сөз байласып, 2020-2021 жылдар аралығында, кадрлық және қаржылық құжаттарды бұрмалап, инфекциялық стационарға 7 тұлғаны формалды орналастырып, заңсыз төленген ақшаны өз мүдделеріне пайдаланғанын тергеу барысында анықтады.
Жас балалары бар екендігін ескере отырып, сот үкімін орындау мерзімі кейінге шегерілді, ал қылмыс бастамашысы – бас дәрігерге қатысты қылмыстық іс, жеке өндірісте тергелуде.
Сот үкімі заңды күшіне енген жоқ.
