Ақмола облысының прокуроры Майлыбаев Айдос Серікханұлы А. Мырзахметов атындағы Көкшетау университетінің студенттерімен және профессорлық-оқытушылар құрамымен кездесті, деп хабарлайды «AqmolaNews» ақпараттық агенттігі.
Облыстық қадағалау органының басшысы сот отырысы залымен, криминалистика полигонымен және заң клиникасымен танысып, университеттің материалдық-техникалық жабдықталуына жоғары баға берді.
Айдос Серікханұлы облыс прокуратурасының атқарылып жатқан жұмыстары, қызметке кіру тәртібі және конкурстық іріктеу кезеңдері туралы айтты.
Жоғары оқу орнының кадрлар ұстаханасы екендігіне назар аударып, Ақмола облысының прокуратурасында Абай Мырзахметов атындағы университеттің 20 түлегі қызмет атқарып жатқанын атап өтті.
Студенттермен кездесу достық атмосферада өтті, қатысушылар жайылымдық жерлерді қайтару бойынша жүргізіліп жатқан жұмысқа, қылмыстық заңнаманың гуманизациялауға, заңнамадағы өзгерістерге, қызмет атқару шарттарына, біліктілік талаптарына және Бас прокуратура жанындағы құқық қорғау органдары академиясының қызметіне қызығушылық танытты. Барлық қызықтырған сұрақтарға дәл және нақты жауаптар алды.