9-31 тамыз аралығында Алматы мен Нұр-Сұлтан әуежайларында кәмелетке толған жолаушылардың салмағын ерікті түрде өлшеу шарасы қолған алынады, деп хабарлайды ҚазАқпарат тілшісі.
Ұшаққа мінер алдында салмақ өлшеу халықаралық әуе көлігі қауымдастығының (IATA) ережелерінде көзделген. Қазақстан әуежайлары да осы тәжірибені қолға алып отыр. Бұл шара бір жағынан ұшу қауіпсіздігін арттыру үшін, екінші жағынан статистикалық деректерді жинау үшін қажет.
«2021 жылғы 9-31 тамыз аралығында Алматы және Нұр-Сұлтан әуежайларынан ішкі және халықаралық рейстермен ұшатын 18 жастан асқан жолаушыларға ерікті салмақ өлшеу ұсынылады. Процедура бес жылда бір рет жүргізіледі», – деп хабарлады Air Astana. Әуе компаниясы салмақ өлшеудің билет құнына еш әсер етпейтінін мәлімдеп отыр.
