Көкшетау қаласы «Достар» Мәдениет сарайында «Тыңда, дала Жамбылды» атты аймақтық оқушылар айтысы өткізілді. Жыр додасы ел тәуелсіздігінің 30 жылдығын мерекелеу аясында ұйымдастырылды,-деп хабарлайды «Aqmola News» ақпарат агенттігі.
Айтыс сахнасына барлығы төрт жұп шықты. Аршалы, Бұланды, Ерейментау, Целиноград аудандарынан алты ақын және Солтүстік Қазақстан облысынан екі ақын бақ сынады.
Жас өрендер жыр алыбы Жамбыл тұлғасын арқау етіп, тәуелсіз еліміздің тарихын, әр жылдардағы жетістігін, бүгіні мен болашағын жырлады.
Айтыс додасына Көкшетау газетінің бас редакторы, ақын Серік Жетпісқалиев, Мәлік Ғабдуллин музейінің директоры Құдайберлі Мырзабек, халық шығармашылығы орталығының мәдени демалыс бөлімінің басшысы Асылбек Әбенов қазылық етті.
Марапаттау рәсімінде облыстық мәдениет басқармасының басшысы Айгүл Сәбитова айтыс өнерін ту еткен аузы дуалы жас ақындарға сәттілік тіледі.
Айтыс қорытындысында қазылар алқасының шешімімен үшінші орынды Ақтілек Қайымхан, Марал Серікжан, Сая Тұрсынбек еншіледі.
Ал, екінші орынды Диас Аяған жеңіп алса, бірінші орынды Бергенбек Азатбек алды.
Айтыстың бас жүлдесін ерейментаулық ер Бөгенбай ауылының ақыны Сәттібек Серікболатұлы қанжығасына байлады.
