Елімізде төтенше жағдай кезінде сауда орындарында әлеуметтік маңызды азық-түлік өнімдеріне бағаны заңсыз көтергендер жазаға тартылмақ, – деп хабарлайды «Aqmola news» ақпарат агенттігі.
Қазақстан Республикасының сауда, ауыл шаруашылығы және ұлттық экономика министрліктері осы жылдың 4 сәуірінде «Төтенше жағдай кезінде әлеуметтік маңызды азық-түлік тауарларының шекті бағасын енгізу туралы» бірлескен бұйрыққа қол қойды. Енді елдегі төтенше жағдайды пайдаланып халықтың қалтасына түсіп, бағаны заңсыз көтерген кәсіпкерлер жазаға тартылмақ.
Ақмола облысында да алғашқы қажетті азық-түлік өнімдерінің шекті бағасы қойылды. Оған сәйкес:
– бірінші сұрыпты бидай ұны, килограммы – 148 теңге
– бірінші сұрыпты бидай ұнынан жасалған нан, килограммы – 160 теңге
– түтік кеспе (өлшенген), килограммы – 215 теңге
– қарақұмық жармасы (ядрица, весовая), килограмм – 339 теңге
– күріш (өлшенген), килограммы – 307 тенге
– сиыр еті (сүйекті жауырын-кеуде бөлігі), килограмы – 1800 теңге
– тауық жұмыртқасы (I санат), оны – 267 теңге
– күнбағыс майы, литрі – 417 тенге
– ас тұзы ( «Экстра» басқа), килограмм – 51 теңгеден аспауы тиіс. Соңғы айда қазақстандықтар дәл осы өнімдерді көбірек сатып алғаны белгілі болды. Сондай ақ жыл басынан бері осы азық-түліктерге баға едәуір өскені байқалған. Әлеуметтік маңызды азық-түлік өнімдеріне шекті рұқсат етілген бағадан асырғандарға 265 100 теңгеден 530 200 теңгеге дейінгі сомада айыппұл салынбақ.
Егер сіздер әлеуметтік маңызды азық-түлік өнімдеріне бағаның аталған межеден көтерілгенін байқасаңыз http://www.dosmart.kz/ порталына тауар бағасы көрсетілген чекті жіберуіңізге немесе тиісті органдарға хабарлауыңызға болады.
Естеріңізге сала кетсек, елімізде төтенше жағдай режимі 16 наурыздан 15 сәуірге дейін әрекет етеді.