ҚР бас санитар дәрігерінің қаулысына сәйкес Көкшетау вокзалы станциясының нысанына шығарып салушылар мен қарсы алушыларға кіруге шектеу қойылды. Сонымен қатар басқа да келушілер кіргізілмейді. Бұл туралы Көкшетау қаласы теміржол вокзалының бастығы Роза Арыстанқызы мәлімдеді,-деп хабарлайды «Aqmola News».
Карантин режимі енгізілген сәттен бастап, жолаушылар тасымалдайтын пойыздарды қысқарту шаралары қабылданған. Қазіргі таңда жолаушыларды тасымалдайтын 36 пойыздың 2-уі ғана күн сайын қатынаса, 6-уы күн ара жүреді. Ал 4 жұп қала маңы электрпойыздары тоқтатылған.
Роза Арыстанқызының сөзінше, COVID-19 вирусының таралуын болдырмау, оның инфекцияларын жою мақсатында вокзалға 4 дана санитайзер орнатылған. Вокзал іші сағат сайын дезинфекцияланып, желдетіледі. Led экранда коронавирус туралы ақпарат көрсетіліп, 30 минут сайын дауысзорайтқыш арқылы вирустан сақтанудың алгоритмдері хабарланады.
Вокзал жұмысшылары қорғаныс маскасы мен бір реттік қолғаппен қамтамасыз етілген.
