Көкшетауда совет үкіметі әскерінің Ауған жерінен шығарылғанына 31 жыл толуына байланысты интернационалист–жауынгерлер саябағындағы ескерткішке гүл шоқтарын қою шарасы өтті, деп хабарлайды Aqmola News ақпарат агенттігі.
Шараға облыс әкімінің орынбасары Айна Мысырәлімова, ооблыстық полиция департаменті бастығының орынбасары Бақытжан Ералин, облыстық қорғаныс істері департаментінің бастығы, подполковник Руслан Қасымов, «Ауған соғысының ардагерлері мен мүгедектері одағы» қоғамдық бірлестігінің төрағасы Дуанбай Ыбырай, Ауған соғысына қатысушылар және әскери-патриоттық клуб пен жастар бірлестігінің өкілдері интернационалист-жауынгерлер қатысты.
Жиында ауған соғысының бір топ ардагері облыс әкімі орынбасарының Алғыс хатымен марапатталды.
«Осыдан 31 жыл бұрын 15 ақпан күні Совет одағы әскерлерінің соңғы шебі Ауған жерінен шығарылды. Отан үшін от кешкен ардагерлеріміздің ерлігі еш ұмытылмайды», – деді Айна Мысырәлімова.
Ақмола облыстық қорғаныс істері департаментінің бастығы Руслан Қасымовтың айтуынша, Ақмола өңірінен ауған жеріне 1113 ақмолалық аттанып, оның 60-қа жуығы үйіне оралмаған.
