Ақмола облысында биыл 54 елдімекенде сумен қамту жүйелерін жөндеу және салу бойынша 62 жоба жүзеге асырылуда. Аталған жобаларға бюджет қоржынынан 10,3 млрд теңге бөлінген. Бұл туралы өңірлік коммуникациялар қызметінде өткен брифингте облыс әкімі Ермек Маржықпаев мәлімдеді, – деп хабарлайды «Aqmola News».
Жобалар толық жүзеге асырылса 30 мыңнан астам ақмолалық тұрғын орталықтандырылған ауыз сумен қамтамасыз етіліп, өңірдің ауыз сумен қамтамасыз етілуі 83 пайызға жетпек.
«Жол картасы» бағдарламасы шеңбеінде сумен қамту жүйелерін дамыту бойынша 2023 жылға дейін 118 елдімекенде су құбыры жүйелерін салу жоспарланған. Сондай-ақ, 60 шағын ауылдарда блок-модульдер орнату қарастырылды, – дейді облыс әкімі.
