Көкшетау қаласы Застанционный кентіндегі Ец-166/24 түзету мекемесінде коронавирус инфекциясына қарсы шаралар күнделікті жүргізіледі. Мекеме базасында дезинфекция жасалып, жазасын өтеушілерге қорғаныш құралдары тегін таратылады,-деп хабарлайды “Aqmola News».
Түзету мекемесінің тәрбие жөніндегі бөлім бастығы Жеңіс Ыбыраевтың айтуынша, облыстың бас санитар дәрігерінің қаулысына сәйкес, барлық санитарлық талаптар орындалады.
«Бүгінде түзету мекемесінде барлығы 120 жазасын өтеуші бар. Олардың барлығы дерлік жұмыспен қамтылған. Олар қаланы абаттандыру жұмыстарында, құрылыста, тігін цехында, қонақүйлерде, дәмханаларда жұмыс істейді. Еңбек шартына сәйкес, екі жақты барлық талаптар сақталады. Олар күндіз жұмыстарына барып, кешке түзету мекемесінің аумағына оралады. Олардың тәртіптерін арнайы жасақ қадағалайды,-дейді Жеңіс Ыбыраев.
Жұмыс уақыты аяқталып мекеме аумағына жеткізілген жазасын өтеушілер кіре берісте дене қызуы өлшеніп, антисептикпен қолын тазартқан соң, екінші қабатқа кезекші бөлімге жіберіледі. Ол жерде толық тексерістен өткізіледі.
Сонымен қатар бостандығы шектеулі тұлғаларға мекеме әкімшілігі тарапынан тегін бірнеше рет қолдануға арналған маскалар мен қолғаптар таратылып отырады.
