Көкшетау қаласы әкімі Амангелді Смайлов Көкше ән мектебінің өкілі, белгілі дәстүрлі әнші, жыршы, термеші Қажыбай Жахиннің қайтыс болуына байланысты көкшеліктерге және салдың туыстарына көңіл айтты,-деп хабарлайды «Aqmola News».
Кешегі серілер мен ақындардың жолын жалғастырып, жас буынға саналы тәрбие дарытқан Көкшенің асылы – Қажыбай ақынның өмірден өтуіне байланысты туысқандары мен жақындарына, Көкшетау халқына қайғырып көңіл білдіремін. Ән өнерінің хас шебері – Қажыбай Жахиннің әндері халық жадында мәңгі сақталады. Арқаның ажарын ашқан асыл азаматы – Қажыбай ағамыздың жатқан жері жайлы, топырағы торқа болып, жәннәттан орын бұйырсын дейміз,-дейді көңіл білдіруші Амангелді Смайылов.
Қажыбай Жахин Қызылту ауданы, Сілеті өңірі, Қулыкөл кеңшары, Береке ауылында туған. Қажыбайдың еліктеп өсер ортасы өнерге жақын туыс-тумалары аз емес еді. Ең алдымен, әкесі Бадықтың өзі, шешесі Зәмзәмия елді аузына қаратқан дәулескер әншілер еді.
Ж.Елебеков атындағы өнер училищесінде білім алып, талай байқаулардың жеңімпазы атанған әншіге ұстазы Қайрат Байбосынов «Айбозым» деп ат қойып, Жәнібек Кәрменов сынды ұстаздары жоғары бағасын берген.
