«Әділетті әрі прогрессивті Қазақстанның Халықтық Конституциясы үшін» өңірлік коалициясының мүшелері Ақмола облыстық көпбейінді ауруханасы ұжымымен кездесу өткізді. Жиын барысында медицина қызметкерлеріне жаңа Конституция жобасының негізгі бағыттары мен жаңашыл тұстары жан-жақты түсіндірілді.
Кездесуде коалицияның атқарушы хатшысының орынбасары Ақманат Әлімбетова сөз алып, ұсынылып отырған негізгі заң жобасының басты басымдықтарына тоқталды. Оның айтуынша, жаңа Конституция елдегі саяси және әлеуметтік жаңғырудың негізі болмақ.
Сондай-ақ, хатшы орынбасары медицина қызметкерлерінің қоғамдағы рөлі ерекше екенін атап өтіп, құқықтық мемлекет құру жолында әр азаматтың жауапкершілігі маңызды екенін жеткізді.
Коалиция мүшесі Ғалия Сабатаева референдумның тарихи маңызын тілге тиек етті. Ал, Айдын Раисов өз сөзінде стратегиялық маңызы бар реформаларды халықтың қолдауы табысты жүзеге асырудың кепілі екенін атап өтті. Кездесу барысында медицина қызметкерлері өз сауалдарын қойып, ұсыныстарын білдірді. Ашық диалог форматында өткен жиын өзара түсіністік пен пікір алмасуға негізделді.
Шара соңында коалиция өкілдері ұжымды алдағы референдумға белсенді қатысуға шақырып, азаматтық ұстанымды білдіру ел дамуына қосылған нақты үлес екенін атап өтті.
Осылайша, еңбек ұжымдарымен өткізілген мұндай кездесулер жаңа Конституция жобасын кеңінен түсіндіруге және қоғамның түрлі салаларындағы пікірлерді ескеруге бағытталған маңызды қадам болып отыр.
