Ақмола облысындағы кәсіпорындарда техникалық мамандарға деген тапшылық біртіндеп азайып келеді. Мемлекет басшысы жариялаған «Жұмысшы мамандықтарының жылы» бұл бағыттың дамуына қосымша серпін берді: жұмысшы және инженерлік мамандықтарға бөлінетін гранттар саны артты, ал осы кәсіптердің беделі айтарлықтай өсті. Бүгінде студенттер оқу барысында алған білімдерін қай салада қолдана алатынын нақты түсінеді, ал өңір кәсіпорындары көптен күткен жас мамандар легін қабылдап жатыр, деп хабарлайды Ішкі саясат басқармасының ресми сайты.
Бұл – өңірдегі ең заманауи білім беру мекемелерінің бірі. Мұнда оқу «тәжірибе арқылы білім» қағидаты бойынша ұйымдастырылған. Колледж базасында әлемдік деңгейдегі құрал-жабдықтармен жабдықталған 20 құзыреттілік орталығы жұмыс істейді. Студенттерді машина жасау, құрылыс, энергетика, IT және басқа да салалар бойынша даярлайды. Оқыту дуальды форматта өтеді: сабақтар өндірістегі тәжірибемен ұштасып, студенттер «Тыныс» АҚ, «КАМАЗ Инжиниринг», Қазақстан агроинновациялық корпорациясы сияқты кәсіпорындарда тәжірибеден өтеді.
Колледждің әдіскері Тлек Сабитова оқу орнының бүгінгі таңда үш деңгейлі даярлық жүргізетінін айтады: жұмысшы біліктілігі, техникалық және кәсіптік білім, сондай-ақ қолданбалы бакалавриат.
«Бізде шамамен 2500 студент білім алады, екі жүзге жуық оқытушы мен өндірістік шебер жұмыс істейді. Дайындық 26 мамандық және 100-ден астам біліктілік бойынша жүргізіледі. Көптеген студенттер дуальды оқудың арқасында қаламызда қалып жұмыс істейді. Өндірістік тәжірибе – өзін көрсетуге нақты мүмкіндік, ал жиі жағдайда студенттерді тәжірибеден кейін бірден жұмысқа шақырады», – дейді әдіскер.
Колледжде цифрлық технологиялар белсенді енгізілуде: мыңнан астам компьютер, VR жабдықтар, 3D-принтерлер және оқу тренажерлері студенттердің заманауи дағдыларды меңгеруіне көмектеседі. Білім беру ортасы ерекше қажеттіліктері бар студенттер үшін де бейімделген.
WorldSkills чемпионаттарында колледж студенттері үлкен жетістіктер көрсетіп жүр. Өңірлік кезеңнің жеңімпазы Александр Цалко болашақ мансабын IT саласымен байланыстыруды жоспарлап отыр.
«Біз ауыл шаруашылығы мен картографияда қолданылатын дрондармен жұмыс істеуді үйренеміз. Колледж техникалық болғанымен, IT бағыты қазір өте сұранысқа ие, біз оны тәжірибе барысында анық сезінеміз», – дейді ол.
Жұмысшы мамандықтарының мәртебесі шынымен өсіп жатқанын түлектер де растайды. Мысалы, «Машина жасау технологиясы» мамандығы бойынша білім алған Максим Макулаков қазір өндіріс орындарының бірінде еңбек етеді.
«Мен мамандығымды таңдағаныма ешқашан өкінген емеспін. Әке-шешем техникалық бағыттың болашағы зор екенін айтқан. Қазір бұл сөздер расталды: гранттар көбейіп жатыр, жалақы артып келеді, мемлекет қолдау көрсетуде. Жұмысшы мамандықтары барған сайын тартымды болып барады», – дейді Максим.
Колледждің әлеуметтік серіктестері мұндай ынтымақтастықтың маңызын ерекше атап өтеді. «Қазақстан Агро Инновациялық Корпорациясы» ЖШС өндіріс бөлімінің бастығы Қайрат Дюсенбековтің айтуынша, соңғы жылдары кәсіпорындарға жас мамандардың ағылып келуі артқан, ал жастар жұмысшы мамандықтарын таңдап, өндіріске белсенді араласа бастады.
«Қазір жұмысшы мамандықтарына сұраныс бұрын-соңды болмағандай жоғары. Біз көп мөлшерде техника шығарамыз, сондықтан мамандарға зәруміз. Бізде тәжірибеден өткен студенттердің 80 пайызы жұмысқа қалады. Кәсіпорынның 360 қызметкерінің ішінде 30-ға жуығы – колледжден кейін келген жас мамандар. Біз оларға жұмыс орындарын ұсынамыз, әрі қарай өсуге және біліктілігін арттыруға мүмкіндік береміз», – дейді ол.
Жалпы алғанда, Көкшетау жоғары техникалық колледжі өңірдегі кадр тапшылығын шешуде маңызды рөл атқарып отыр. Ол заманауи білім беру технологияларын, тәжірибеге негізделген оқытуды және бизнестің тығыз серіктестігін ұштастырып, еңбек нарығына сенімді әрі дайын мамандарды шығарып отыр.
