Ерейментау ауданында «Жұмыспен қамту жол картасы-2020» мемлекеттік бағдарламасы шеңберінде Новомарковка селосындағы орта мектепке күрделі жөндеу жұмыстары басталды, – деп хабарлайды «Aqmola news».
Бұл туралы Ерейментау ауданы әкімдігінен мәлім етті. Ерекшелігі сол ауыл мектебін жөндеуге ауданның Жұмыспен қамту орталығында кезекте тұрған 15 ауыл тұрғыны тартылған.
Новомарковка ауылы үшін бұл екі есе қуаныш болды. Бір жағынан талайдан жөндеу көрмеген білім ордасы жөнделсе, екіншіден ауыл тұрғындары жұмыспен қамтылды. Оқушылар қашықтан оқыған соң оқу жылы аяқталмастан 11 мамырда жөндеу жұмыстары басталып кетті. Күрделі жөндеу жұмыстарына мердігер ұйым «Қазбайлық Астана» жауапкершілігі шектеулі серіктестігі өз мойнына алды. Бәрі ойдағыдай болса 20 тамызда мектеп қайта пайдалануға беруді жоспарлап отырмыз, – дейді аудан әкімі Абай Әлжанов.
