Ақмолалық құтқарушылар 1 маусымнан бастап балаларды жүзуге тегін үйретпек. Жүзуге үйрету Көкшетау, Щучинск қалалары мен, Бурабай және Зеренді шипажайларында ұйымдастырылады, – деп хабарлайды «Aqmola news» Ақмола облысының төтенше жағдайлар департаментінің баспасөз қызметіне сілтеме жасап.
Құтқарушылар осылайша жазғы суға түсу маусымы кезінде балалардың қайғылы оқиғаларға ұшырамауының алдын алмақ. Балаларға арнайы сабақтар Көкшетау қаласындағы Қопа көлінің жағажайындағы құтқару бөлімшелері ауданында жүргізілетін болады.
Оқыту сабақтары ауа райы қолайлы жағдайда маусым айынан тамыз айына дейін өтпек. Баланы жүзуге жіберу үшін тек денсаулық жағдайы туралы медициналық анықтама қажет. Балалар аптасына екі рет сейсенбі және бейсенбі күндері сағат 15.00-ден 17.00-ге дейін оқиды. Құтқарушылар барлық балаларды жүзуге үйретуге дайын.
«Жақсы жүзе білу – судағы қауіпсіз демалудың маңызды шарттарының бірі. Оқыту барысында балаларға жүзуді, сондай-ақ судағы төтенше жағдайлар кезіндегі дұрыс көмек көрсетуге үйретеді. Суға түсудегі бастапқы кезекте дұрыс дем алып, суда өзін ұстауды игеру керек. Оқуды жалғыз бастаудың қажеті жоқ. Тек жаттықтырушының, ата – аналардың немесе құтқарушылардың жіті бақылауымен ғана жүзуді үйрену қажет», – дейді Ақмола облысы төтенше жағдайлар департаментінің бастығы Алексей Советов.
