Шегіртке зиянкестерімен күресуге 2023 жылы республикалық бюджеттен 3,8 млрд теңге бөлінді деп хабарлайды Stan.kz ақпарат агенттігі.
Бұл туралы Ауыл шаруашылығы министрлігінің баспасөз қызметі хабарлады.
Мамандардың болжауынша, шегіртке 1,6 миллион гектар аумаққа таралуы мүмкін.
«Бүгінгі таңда 385,3 мың га алаңда пестицидтердің қажетті қоры қалыптастырылды. әкімдіктермен бірлесіп, өңірлерде жедел штабтар құрылды және мониторинг пен химиялық өңдеу жөніндегі жұмыс жоспары бекітілді», – дейді АШМ баспасөз қызметі
Аумақтарды өңдеуге мамандандырылған техника, соның ішінде жер үсті және әуе көлігі тартылады.
Министрліктің пайымдауынша, Түркістан облысында мароккалық шегіртке дернәсілдері пайда болған. Аймаққа пестицидтер толығымен жеткізілді. 8-9 сәуірде қорғаныс іс-шараларын өткізуді бастау жоспарлануда.
Басқа аймақтарда химиялық өңдеу шегірткелердің таралу ошақтары анықталған кезде басталады.
