«Қазақ» газеті – 1913 жылғы 2-ші ақпаннан бастап Орынбор қаласында аптасына бір рет, 1915 жылдан аптасына екі рет шығып тұрды.
Таралымы 3000, кейін 8000-ға жеткен. Газет бастырушы Хұсайын Кәрімовтың баспаханасында басылып шыққан. Бірінші редакторы ғалым, ұстаз, жазушы, қоғам қайраткері Ахмет Байтұрсынұлы болған, екінші редакторы жазушы, қоғам қайраткері Міржақып Дулатов.
Басылымның таралымы қазақ мекендеген барлық аймаққа жетіп жатты. Тіпті Ресей, Қытай қазақтары да тапсырыс беріп, алдыртып оқыған.
«Қазақ» газетасын 10 облысқа қараған киіз туырлықты қазақ байдың баласынан 1913 жылдың ішінде алдырып тұрғандардың есебі мынау:
1) Торғай облысы – 694,
2) Семей – 612,
3) Ақмола – 584,
4) Сырдария – 327,
5) Орал – 301,
6) Жетісу – 157,
7) Ішкі оралдық – 136,
8) Ферғана – 30,
9) Самарқан – 8,
10) Закаспий – 5.
