Ақмола облысында коронавирус індетін жұқтырғандар саны 60% – ға өсті. Маусым айында тәж ауруының 19 жағдайы анықталған болса, осы айдың соңғы 4 күнінде 12 жағдай тіркелді. Қазір күніне 4 адамға дейін ауырады. Эпидемиологтардың айтуынша, аймаққа сырттан келген туристердің көптігі және елордаға жақын орналасуымызға байланысты қауіпті вирус тез таралады. Мәселен, өткен айда облыстағы Щучинск-Бурабай курорттық аймағына келген Ұлыбританиялық туристің өзімен короновирус індетін алып келгені мәлім болды.
Облыстың бас санитар дәрігері Айнагүл Мусинаның айтуынша әзірге карантиндік шектеулер еңгізілмейді. Алайда, жағдай осылай ушыға берер болса шара қолданылады.
«Біздің өңірге вирус өзге аймақтардан және Нұр-Сұлтан қаласынан келіп жатыр. Туристер ағыны көп. Індет жұктырушылардың 80%-ы вакцинацияланбаған және уақытылы ревакцинация мен қайта ревакцинацияны алмаған адамдар. Әзірге біз шектеулер енгізбейміз. Егер эпидемиологиялық жағдай күрделене түссе, онда шектеулер қойылады».
Камила Абдельманова
