Целиноград ауданы Ақмол ауылында қар құрсауынан алты адам, оның ішінде 3 бала құтқарылды, – деп хабарлайды Ақмола облысы ТЖД баспасөз қызметі.
Өткен демалыс күндері қатты желдің салдарынан қалың қар жауу нәтижесінде Мортық ауылының бағыты бойынша Жаңаесіл ауылынан 4 шақырым жерде «Volkswagen Polo» маркалы жеңіл автокөлігі қар құрсауында қалып қалған болатын. Автокөліктегі адам саны 6, оның ішінде 3 бала.ТЖД қызметкерлерінің жедел әрекеттерінің арқасында аталған азаматтар Мортық ауылына эвакуацияланды.
Ақмола облысы Төтенше жағдайлар департаменті мұндай жағдайлардың алдын алу үшін дауылды ескерту алған кезде алыс жолға барудан және елді мекендерден ұзап кетпеу керектігін хабарлайды. Егер сіз төтенше жағдайға тап болсаңыз, онда сізге машинаның авариялық сигналдарын қосу және «112» құтқару қызметіне дереу хабарлау қажет. Қар көшкіні кезінде техниканы жиі қардан тазарту қажет. Өзіңізді және жақындарыңызды қорғаңыз!
