Ақмола облысы бойынша Экономикалық тергеу департаментінің қызметкерлері Нұр-Сұлтан – Көкшетау автожолында орналасқан заңсыз жұмыс істеп тұрған казиноны анықтады, деп хабарлайды ҚазАқпарат.
Ведомствоның мәліметінше, тексеру барысында казинодан 1 миллион теңгеден астам және 900 АҚШ доллары сомасындағы ақша қаражаты, «покер» ойынына арналған фишкалар, ойын карталары табылып, тәркіленді.
«Осыған байланысты Қылмыстық кодекстің 307-бабы (Заңсыз ойын бизнесін ұйымдастыру) бойынша тергеу басталды», – деді Ақмола облысы бойынша Экономикалық тергеу департаменті.
Осы ретте, ведомство қызметкерлері қаржы саласындағы құқық бұзушылықтарға тап болған немесе осындай жағдайды білетін ақмолалықтарға Ақмола облысы бойынша Экономикалық тергеу департаментіне 8 (7162) 25-62-84 сенім телефоны арқылы хабарласуын сұрайды.
