Ақмола облысында сотталушы әскери бөлім бақылаушысына пара беріп, есірткі мен ұялы телефондарды түзету колониясына кіргізбек болды, деп хабарлайды «Aqmola News» ақпарат агенттігі.
30 жастағы барынша жоғары қауіпсіздік сақталатын түзеу мекемесінде жазасын өтеуші айласын асырмақ болған. Оңаша қалған сәтті оңтайлы пайдаланған ол бақылаушыға ақша ұсынып түзеу мекемесіне белгілі бір сомаға ұялы телефон мен есірткі кіргізуге көмектесуін өтінген. Бақылаушы жігіт ақша алуға бірден келіседі.
«Алдын ала жоспарланған қылмыстық атқару жүйесі департаменті, әскери полиция және мемлекеттік қауіпсіздік қызметінің бірлескен жұмысы бірден нәтижесін берді. Қойылым сәтті шығып, бақылаушының карталық есепшотына 20 мың теңге сомасында қаражат аударылған. Ал келесі күні мекемедегі сотталушыға да еш кедергісіз уәде етілген үш телефон мен есірткі заттары қолына тиген. Дегенмен, онымен бірге бірден мүдделі қызметтің тергеу әрекеттері де басталды», – дейді Ақмола облысының қылмыстық атқару жүйесі департаментінің баспасөз хатшысы Ирина Горнова.
Қазір түзеу мекемесіндегі тергеу амалдары жалғасып жатыр.
