Коронавирус вакцинасын сақтау үшін өңір әкімдіктері тоңазытқыш құрылғыларын алып жатыр. Бұл туралы ОКҚ өткен баспасөз мәслихатында Денсаулық сақтау бірінші вице-министрі Марат Шоранов мәлім етті, деп хабарлайды ҚазАқпарат тілшісі.
«Вакцинаның сапасын қамтамасыз ету үшін өңірлер тоңазытқыш құрылғыларын алып жатыр. Ол тоңазытқыштарда вакцина сақталады әрі сол арқылы тасымалданады», – деді Марат Шоранов ОКҚ-да өтіп жатқан баспасөз мәслихатында.
Оның айтуынша, вакцинаны жеткізу жұмысы негізгі 4 кезеңнен тұрады. Ең алдымен өндірушіден бірыңғай дистриьютордың қоймасына жеткізіледі. Одан кейін бірыңғай дистриьютордың қоймасынан өңірлердегі денсаулық сақтау басқармаларының дәріхана қоймаларына әкелінеді. Осыдан кейін үшінші кезеңде өңірлердегі денсаулық сақтау басқармалары бұл вакциналарды қалалар мен аудандардағы медициналық ұйымдарға тасымалдайды. Төртінші кезеңде вакцина сол медициналық ұйымдарда сапалы күйде сақталуы керек.
Еске сала кетсек бұған дейін Марат Шоранов вакцинация жүргізер алдында азаматтардың дене температурасы өлшеніп, жүрек-қантамыр жүйесін аускультациялау және жұтқыншақты тексеру шаралары жасалатынын айтқан еді. Егер температура 37°C-тан асса, вакцинация кейінге қалдырылады.
