COVID-19-ға қарсы вакцинасын алушылардың ақпараттық келісімі ескеріліп, ағзаның аллергияға қарсы реакциясы тексеріледі. Бұл туралы өңірлік коммуникациялар қызметі алаңында Ақмола облысы денсаулық сақтау басқармасының басшысының орынбасары Сыздықов Нариман жеткізді,-деп хабарлайды «Aqmola News».
Қазақстанда 1 ақпаннан бастап жаппай коронавирусқа қарсы вакцина егіле бастайды. Бұл туралы 19 қаңтар күнгі үкімет отырысында денсаулық сақтау министрі Алексей Цой хабарлаған еді.
Ақмола облысы тұрғындарына вирусқа қарсы екпе егу қалай жүзеге асырылатындағын Нариман Сыздықов түсіндірді.
Оның айтуына қарағанда, бірінші кезеңде инфекциялық аурухана, жедел жәрдем, реанимация бөлімі, аурухананың қабылдау бөлмесінде істейтін қызметкерлер, санитарлық-эпидемиологиялық қызмет мамандарына вакцина салынады.
Содан соң мұғалімдер, білім беру мекемелердің қызметкерлері, балаларға арналған мекемелердің және құқық қорғау органдарының қызметкерлеріне екпе егіледі.
Үшінші кезеңде денсаулық сақтау мекемелерде арнайы есепте тұрған науқастар мен созылмалы аурумен ауыратын тұрғындарға салынады,-деді спикер.
Вакциналау ерікті түрде жүргізіледі, өз еркімен келісім берген тұрғындарға екпе салынады деді ол.
