ЕГІНДІКӨЛ, 2026 жылғы 11 маусым – Бүгін Егіндікөл ауылында өткен «Egindikol ECO FEST-2026» жастар экологиялық акциясына Қорғалжын ауданының белсенді жастары да қатысып, табиғатты қорғау мен экологиялық мәдениетті насихаттауға өз үлестерін қосты.
Фестиваль аясында жастар экологиялық бастамаларға қолдау білдіріп, қоршаған ортаны қорғауға бағытталған түрлі іс-шараларға қатысты. Бағдарлама аудан әкімі Юрий Викторович Курушиннің құттықтау сөзімен басталып, қатысушылардың бірлескен ағаш отырғызу акциясымен жалғасты.
Сондай-ақ, фестиваль барысында Бектемір Сүфі кесенесіне танымдық экскурсия ұйымдастырылып, қатысушылар өңірдің тарихи-мәдени мұрасымен танысты.
Кешкі бөлімде Егіндікөл, Астрахан және Қорғалжын аудандарының жастары арасында достық қарым-қатынасты нығайтуға бағытталған спорттық жарыстар өткізіліп, белсенді қатысушылар марапатталды.
Іс-шара мерекелік open-air форматындағы жастар кешімен қорытындыланды. «Egindikol ECO FEST-2026» фестивалі өңір жастарының өзара ынтымақтастығын арттырып, экологиялық жауапкершілікті қалыптастыруға ықпал еткен маңызды алаң болды.
