Салмағы 185 тонна кальянға арналған темекінің экономикалық контрабандасын жасаған Алматы тұрғынына қатысты сотқа дейінгі тергеу аяқталды, – деп хабарлайды Tengrinews.kz тілшісі Қаржы мониторингі агенттігінің баспасөз қызметіне сілтеме жасап.
«Жедел-іздестіру шараларын жүргізу кезінде жалпы салмағы 185 тонна кальянға темекіні Түрік Республикасынан ҚР-ның (Алматы қаласына) кеден аумағына заңсыз әкелу дерегі анықталды. Темекі ҚР кеден заңнамасын бұза отырып, мақта иірімжібінен жасалған мата түрінде әкелінген. Кальянға арналған темекінің кедендік құны 620 миллион теңгеден асады», – делінген хабарламада.
Тергеу барысында Э.Ражаповтың жалған құжаттарды қолданғаны, тауарларды Еуразиялық экономикалық одақтың кедендік шекарасы арқылы заңсыз өткізу үшін дұрыс декларацияламағаны дәлелденді.
Э.Ражапов 1,5 жылға бас бостандығынан айырылды.
