Ақмолада 13 күн ішінде табиғатты қорғау заңнамасын 180 бұзу фактілері анықталды, деп хабарлайды «Aqmola News» Ақмола облысы полиция департаментінің баспасөз қызметіне сілтеме жасап.
20 қазаннан 19 қарашаға дейінгі аралықта өңірдің полиция қызметкерлері табиғат заңнамасының бқзылуы және заңсыз аң аулау фактілерінің алдын алу мақсатында «Браконьер» жедел алдын алу шараларын өткізуде.
Шара барысында жедел іздестіру топтары құрылып, олар табиғатты заңсыз қолдану әрекеттерін анықтауға кіріскен.
«Рейд шаралары кезінде табиғатты қорғау полициясы қызметкерлері басқа ведомстволардың қызметкерлерімен бірге шолу жасап, әсіресе қорықтар мен табиғи парктердің аумағына баса мән берді. Жүргізілген шаралар нәтижесінде табиғат заңнамасының 180 заң бұзушылығы анықталды. Олардың ішінде Бурабай, Бұланды және Зеренді аудандарында үш факті бойынша сотқа дейінгі тергеу амалдары жүргізілуде», – дейді полицияның баспасөз қызметінен.
Сондай-ақ Біржан сал ауданында оқ-дәрілер мен қару-жарақты заңсыз сақтау бойынша сотқа дейінгі тергеу амалдары басталған. Аң аулау ережелерін бұзғаны үшін 116 адам әкімшілік жауапкершілікке тартылса тағы 34 әкімшілік материал балық аулау ережесін бұзғаны үшін толтырылған. Жүргізілген шара бойынша полицейлер аңшылық мылтықты тасымалдау ережесін бұзылуының 21 фактісін анықтап заңсыз ағаш кесу бойынша 7 әкімшілік хаттама толтырған.
