Ақмола облысы Зеренді ауданында визит орталық өз жұмысын бастады. Орталықтың директоры Күшбай Бұқанов мекеменің жұмысы туралы баяндады,-деп хабарлайды «Aqmola News» ақпарат агенттігі.
Оның айтуынша орталық аймақтың туризм саласын дамыту мақсатында іске қосылды. Орталық Көкшетау ұлттық табиғи паркі мекемесінің жанынан құрылды.
Зеренді аумағы туристер қызығатын көрікті орындарымен ерекшеленетінін барлықтарыңыз білесіздер. Бұл жерге келген кез келген демалушылар өңірдегі барлық туристік нысандар мен демалыс орындары туралы ақпарат ала алады. Оларға осы жерде маршурт карталары мен брошюралар таратылады,-дейді Күшбай Бұқанов.
Туристерге кеңес беру орталығы мемлекеттік мекеме болып табылады. Құрылыс нысанында екі зал мен демалыс бөлмелері орналасқан.
Залдарда жануарлар әлемінің экспонаттары, аңдардың макеттері орын тепкен. Сонымен қатар Зеренді аумағында кездесетін әртүрлі гүлдер мен ерекше емдік шөптердің үлгілері қатырылып қойылған.
