Жақсы ауданында қатты боран аудандық мәдениет үйінің шатырын ұшырып әкетті, деп хабарлайды «Aqmola News» Ақмола облысының төтенше жағдайлар департаментінің баспасөз қызметіне сілтеме жасап.
Оқиға ауа райы жағдайының күрт бұзылып, ақ түтек боранның салдарынан болған.
«Шамамен бүгін 13:48 сағатта 23-25 метр секунд жылдамдықпен соққан дауыл жел тұрған. Дауылдың қатты болғаны соншалық Жақсы аудандық мәдениет үйінің қалың металл жабынымен қапталған шатырын түгелдей жұлып әкеткен. Сондай-ақ, дауылдан әрлеуіш тақтайшалар мен маңдайшалар құлаған. Дауылдан ғимараттың сол жағындағы шамамен 20 метр қоршауы заңымдалып, ағаштар сынды, – деді Ақмола облыстық төтенше жағдайлар департаментінің баспасөз қызметінен.
Ғимарат 1968 жылы салынған. .Шатырдың жалпы аумағы шамамен 1000 шаршы метрді құрайды. Мәдениет үйінің шатырына 2014 жылы күрделі жөндеу жүргізілген.
ҚҰтқарушылар облыс тұрғындары мен қонақтарын төтенше жағдайдың алдын алу үшін үйде қалуларын сұрайды.
