Жақсы ауданында дәрігерлерге тұрғын үйлерден 8 пәтердің кілті табыс етілді,-деп хабарлайды «Aqmola News».
Дәрігерлерге арналған тұрғын үйлердің құрылысын желтоқсан айына аяқтау жоспарланған болатын. Жаңа нысандағы пәтер кілттерін аудан әкімі Бауыржан Малғаждаров салтанатты жағдайда табыс етті.
Пәтер кілттері пандемиямен күресуге ерекше үлес қосып, аудан халқының денсаулығы саласында аянбай еңбек етіп келе жатқан дәрігерлерге табыс етілді.
«Аудандағы денсаулық сақтау қызметкерлеріне пәтер кілттерін табыс еттім. Елімізде белең алған коронавирус пандемиясымен күресте дәрігерлердің еңбегі орасан. Жерлестеріміздің денсаулығын сақтау аса маңызды мәселе. Алдағы уақытта да біз дәрігерлеріміздің жайлы өмір сүруіне барлық қажеттіліктерді жасай бермекпіз. Бұл ауданға мамандарды тартуға да өз ықпалын тигізетін болады, – дейді аудан әкімі Бауыржан Малғаждаров.
Бүгінде мемлекет тарапынан денсаулық сақтау мамандарына көптеп көңіл бөлініп, олардың лайықты өмір сүруі үшін жағдай жасалып келеді.