Жақында «Ақ жол» партиясының республикалық сайлауалды штабының отырысы өтті, деп хабарлайды Орталық сайлау комиссиясы.
Штаб 2020 жылдың 3 қарашасында құрылды, партияның барлық филиалдарында осындай аймақтық штабтар құрылды. Республикалық штабтың басшысы – Азат Перуашев, ал Болат Өтепбаев пен Айгүл Жұмабаева орынбасарлары болып тағайындалды. Штабқа орталық аппараттың барлық жауапты қызметкерлері кірді. Сайлау алдындағы құрылтайдан кейін штаб құрамына партиялық тізімдегі кандидаттар да енгізілді.
Отырыс барысында Азат Перуашев штабтың қазіргі ұйымдастырушылық жұмысы туралы айтып берді.
«Іс-шаралардың желілік кестесі эпидемиологиялық жағдайға байланысты апта сайын жаңартылып, түзетіліп отырады. Қазіргі уақытта сенімді тұлғалардың тізімін тіркеу бойынша белсенді жұмыс жүргізілуде», – деп атап өтті ол.
Азат Перуашев әріптестерін бас санитарлық дәрігердің барлық нұсқауларын мүлтіксіз сақтауға шақырды.
