Щучинск Бурабай курорттық аймағын дамыту мақсатында биылғы жылы 13 инвестициялық жоба қолға алынды. Оның ішінде жол, су құбырлары, канализация, тазалау құрылғыларының құрылысына бағытталған жобалардың құны 22 миллиард теңгені құрады,-деп хабарлайды «Aqmola News».
Бұл жобаларға брифинг барысында аудан әкімі Әсет Мұздыбаев тоқталып өтті. Аудандағы өзекті мәселелердің бірі жолдарды жөндеу екені белгілі.
Ағымдағы жылы Щучинск қаласының жалпы ұзындығы 15, 5 шақырым болатын 13 көшесіне жөндеу жүргізілді. Сонымен қатар Щучинск-Николаевка жолына және Сарыбұлақ ауылына дейінгі жолдар жөнделді.
«Ауыл ел бесігі» бағдарламасы аясында Қызылағаш ауылының ішіндегі жолдарға орташа жөндеу жұмыстары жүргізілуде. Жалпы ұзындығы 20 шақырым болатын Бурабай -Қотыркөл жолына күрделі жөндеу жүргізілген.
Бұдан бөлек. Бурабай кенті жол торабын жөндеуге 238,6 миллион теңге бөлінсе, Горный ықшам ауданындағы жаңа мектепке баратын жолдың құрылысына 65,7 миллион теңге бөлінген.
